قصيدة عصيان للشاعرة منى المنير
#عصيان
ساري الألم ف الروح
جاري ما بين الدم
رغم اني كلي جروح
قلبي ما يوم اعتَّم
ساري الألم دبَّاح
يأمر و يتحكم
و الروح ف دنيا براح
تشجي و تتكلم
يا اللي الوجع كَسْرك
الكون ماليه الأوجاع
اهزمها من صبرك
خليك معاها شجاع
ما تِسَلِّم الرايه
لو مهمان الاحزان
متل الجيوش جايه
واجهها بالعصيان
فَتَّح جميع لبواب
نوَّر قناديلك
دا القلب لسه شباب
امسح دموع ليلك
ارفع جبينك فوق
وبص ف عيونه
تلقى الوجع مخنوق
مقطوعه شرايينه
قوم يا كتير لحزان
ودع قيود الخوف
راح تهدم الجدران
دا النور و اقف ملهوف
مشتاق لنور عينك
مشتاق يشوف الضي
تاجه على جبينك
فرحك بإيدك جيّ
#مصر
#منى_المنير
الشاعرة
والمترجمة/ منى المنير
تعليقات
إرسال تعليق